[ 4 ] உள்ளம் கேட்குமே !? MORE… !

வெளி நாடுகளில் உழைக்கும் சிலரின் குடும்பத்தில் நிகழும் நிகழ்வுகள் பற்றிய உளவியல் பார்வையே இந்த வார ஆக்கம்…

குடும்ப தலைவி ஒரு ஆசிரியையாய்... கணவன் இல்லா தருணத்தில் கண்டிக்கும் காவலனாய்... பணம் காசுகளை கையாள்வதில் பொருளாதார நிபுணராய் இருத்தல் வேண்டும். எதற்கு இதனை குறிப்பிடுகிறேன் என்றால் நான் கூற போகும்  கருத்திற்கு தேவை என்பதற்காகவே...

பிள்ளைகளிடம் காட்டும் பாசம் என்பது நாம் மகிழ்வதற்காகவே ..அது கால சூழலுக்குத்தகுந்த மாதிரி மாற வேண்டும். உதாரணத்திற்கு ஒன்றும் அறியா மழலையை  கொஞ்சும் போது எந்த மொழியிலும் இல்லா வார்த்தை கொண்டு கொஞ்சுவோம்.  அக்குழந்தை எல்லா வார்த்தைக்கும் சிரிக்கும் மீண்டும் மீண்டும் அதே வார்த்தை கொண்டு கொஞ்சி மகிழ்வோம்.  ஆனால் நடை பழகி தனது தேவையை கேட்கும் வயதில் நாம் அப்படி கொஞ்சுவதில்லை மாறாக ஏதாவது தவறு செய்ய முற்பட்டால் நாம் கடிந்து கொள்வோம். கடிந்து கொள்வது மருந்தை போன்றது ஆனால் கோபம் என்பதே காட்டாமல் வளர்ந்த குழந்தை வாழ்வில் வகையாய் மாட்டிகொண்டதை பற்றியே விளக்க விரும்புகிறேன்.

கணவன் வெளிநாட்டில் நல்ல வருவாய் ஈட்டி தனது மனைவி மக்கள் நன்றாக இருக்க மாதா மாதம் பணம் அனுப்பி வைக்கிறார். மனைவி பிள்ளைகளுக்கு சுவையாய் சமைத்து உணவூட்டி மகிழ்கிறாள்.  தான் பெற்ற பிள்ளைகளுக்கு எந்த குறையும் வைக்க வில்லை. காலை உணவிற்கும் பகல் உணவிற்கும் இடையே சிறு சிற்றூண்டி, பகல் உணவிற்கும் இரவு சாப்பாட்டிற்கு இடையே சிறு பண்டம், பிள்ளை மகிழ்ந்து விளையாட விளையாட்டு சாதனங்கள்... பிள்ளைக்கு வீடே சொர்க்கம்  பிள்ளை மனது சிறு வீட்டிற்குள் ஒன்றி போனது.

நினைத்த காரியம் உடனே நிறைவேறியதால் உள்ளம் வெறும் வெற்றிடமாய் அமைந்து போனது !

இதே நிலையில் ஐந்தாம் வகுப்பு வரை வளர்ந்த பிள்ளை ஆறாம் வகுப்பு படிக்க செல்ல அங்கு ஆசிரியர் பாடங்கள் விசயமாக கடிந்து கொள்ள பிள்ளை அழுத வண்ணமாக வீடு வருகிறான். அன்று பிறந்த பாலகனைப் போல கருதும் தாயவள் பதைபதைத்துப் போகிறாள். பிள்ளை ஆசிரியர் கடிந்ததை கூற... தம்பி நீ பள்ளிக்கு செல்ல வேண்டாம் என்கிறாள். இதை என்ன வென்று சொல்வது ? இப்படியே வளர்ந்த மகன் இருபத்து மூன்று வயதாகியும் பேசா மடந்தையாய் வீட்டில் முடங்கி கிடக்கிறான் தாயவளோ முதுமையை எட்டி விட்டாள்... வறுமையின் கோர பிடியில் குடும்பம் தள்ளாடும் நிலை.

கண்டிப்பு என்பது நல்ல மருந்து அவற்றை அளவாய்க்கொடுத்து விடுங்கள் பிள்ளைக்கு எதையும் தாங்கும் இதயம் படைத்த பிள்ளையாய் திகழும்... வலுவிழந்த இதயம்... பிறரிடம்  எதிர் கொள்ள முடியா நிலை ஏற்படும். உறுதியான உள்ளம் படைத்த மனிதனாய் வளர தாயின் அணுகு முறை மிக மிக அவசியம் உள்ளம் கேட்கும் MORE... MORE... என்று பிள்ளைகளுக்கு நல்ல வார்த்தைகளால் புரிய வைத்து ஆசையை தணிக்க வேண்டும்.

கடுமையான கண்டிப்பும் உள்ளம் தடுமாறும் ! எப்படி என்பதை அடுத்த வாரம் காண்போம்...

இன்னும்  வளரும்...

'பத்திரிக்கைத்துறை நிபுணர்'

அதிரை சித்திக்

 [ உள்ளம் கேட்குமே பகுதி-3 வாசிக்க ]